Týrızm jáne sport mınıstrligi «Dene shynyqtyrý jáne sporttyń sıfrlyq platformasy» (e-Sport) aqparattyq júıesin iske qosý jumystaryn júrgizip jatyr. Atalǵan platforma sportshylar, jarystar jáne sporttyq nysandar týraly málimetterdi qamtıtyn biryńǵaı aqparattyq portal retinde qyzmet atqaratyn bolady, dep habarlaıdy Egemen.kz.
Negizgi mindetterge mynalar jatady:
sportshylardyń, jattyqtyrýshylardyń, tóreshiler men ádiskerlerdiń biryńǵaı derekqoryn qalyptastyrý; sporttyq biliktilikti jáne sport uıymdaryna múshelikti elektrondyq formatta rastaý; sporttyq-buqaralyq is-sharalardyń elektrondyq kúntizbesin júrgizý; sport nysandarynyń biryńǵaı tizilimin qalyptastyrý; memlekettik qyzmetterdi proaktıvti sıfrlyq formatqa kóshirý.Sala mınıstrliginiń baspasóz qyzmetiniń málimdeýinshe pılottyq rejımde sportshy, jattyqtyrýshy jáne tóreshilerdiń elektrondyq pasporttarynyń, is-sharalar kúntizbesiniń, sondaı-aq sport ǵımarattary tizilimderiniń modýlderi iske qosyldy. Qazirgi ýaqytta sport federasııalarymen jáne jergilikti atqarýshy organdarmen birlesip júıeni derektermen tolyqtyrý jáne onyń fýnksıonalyn testileý júrgizilip, platformada 83 federasııa men 50 uıym jumys istep jatyr.
Bul rette sporttyq ataqtar berý tártibi ózgerissiz qalady jáne ol 2014 jylǵy 29 shildedegi № 300 buıryqpen bekitilgen erejelermen retteledi. Atalǵan qujat ataqtyń jaramdylyǵyn rastaıdy ári kýálik joǵalǵan jaǵdaıda ony qalpyna keltirýge negiz bolady. Kýálikti qaıta qalpyna keltirý úshin Sport jáne Dene shynyqtyrý isteri komıtetine jazbasha ótinish berý qajet.